हिमाली स्वरहरु – भानुभक्तीय महिमा:राष्ट्रीय एकता

भानुभक्तीय महिमा:राष्ट्रीय एकता

admin July 14, 2010 0

भानुभक्तीय महिमा:राष्ट्रीय एकता
अनन्त गोपाल रिसाल
न्यु जर्सी

घाँसीकी गुनकेसरी, मन-हरी, के किर्ति -के चाकडी?
छाम्दा मल्मल झैँ सलल्ल बगने गीला तकीया सरी
सुत्दामा मन शीतलै कलमले-श्रष्टा र शीरोमणी
धिक्कारीकन चित्त, खै-मलम के? काब्यै छ रामायणी

संस्था-ब्यापक बन्न के? मनमिले, गाह्रो नमिल्दा कठै?
हाम्रा सभ्य समाज हे! अब उठे! छैनन् यहाँ बोझ क्यै!
मीठा ज्ञान अझै छ,छैन-अमिलो, चाखेर मागौँ अब
भानूभक्त गयौ कहाँ? नचिनिने? खोजेर, राखौँ सब|

हाम्रा सम्मान,सम्पत्ती, सद्भाव जन-जातमा
भाषा,धर्म,अनुष्ठान – प्रेम-बैभव साथमा
धर्मले गरियो रक्षा, पर:भाव- पदोन्नती
भाषा नै धन हो त्यस्को, जस्को भाव छ उन्नती

साहित्य कस्तो हो? शिक्षा- संपती यी किताब हुन्
भाव, संस्कार त्यो छैन, पत्रै-पत्र बेकार हुन् !
शब्द-ज्ञान भये आज, धेय-ध्यान पुर्याउने !
चिन्दै अक्षर आत्माको, परमात्मा चिनाउने

तारामा अब देखिन्छन्, नेपाली छन्द बज्दछ
मेघ गर्जन्छ ईन्द्रआदी ,भूमी नेपाल भज्दछ !!
अर्को नेपाल जन्मन्छ, हिमाली भाव खोल्दछ !
स्वर्गमा अब देवादि नेपालीबाट बोल्द्छ !

दैवी खेल रचाइ भानु-भवमा नेपाल यो स्वर्गियो
सीताको नव-जीवनी सरलता, यो विश्वमा गुन्जियो
संसारी, पथभ्रष्ठ कैँ, सु-मनली उद्दार है गर्दियौ
घाँसीका-घरको, समाज-जनको, सम्मानले भर्दियौ|

संस्क्रीती मान्यता वेद, पालीबाट बन्यो नयाँ
न-य-पाली बन्योँ हामी, चम्किन्छ्ओँ विश्व माझमा !
अनास्था, लोभ, शन्ताप, संकिर्ण किन? जालमा?
आफ्नो आधार विज्ञान, नबिर्स्यौं अनिकालमा !

आस्था स्वच्छ सनातनी सरसता – यो वैदिकी दर्शन
किर्ती गान म मुग्ध भै कति गरुँ? मोती-सरी वर्णन?
सुन्दा धर्म, र भावना, नरमता- हिमाल पग्लिन्छ ल
काड्मान्डौँ,तनहुँ-सुगीत, कविता- नेपाल तीर्थ स्थल |

परिवार ठूलो हाम्रो,बिभिन्न जन-जातीय!
सम्मान सबको एक, नेपाली, बन आत्मीय।
भेष-भोजन-भाषाले,भिन्दै भाव?भयो त के?
नेपाली-मनले एक, छौँ ब्यग्लै थर,नामले!

सेर्पा,गूरुङको भाषा,तामाँ-नेवारको पनि
थारु,मगरको आफ्नै,पहिचान फरक् छ नी!
गाँउ-हिमाल, आस्थाकी तराई र प्रदेशकी-
आमा छिन् घरकी घर्ती-बाहुन्-राइ-मधेशकी

पोती रङ्ग अनेक छन्द-रसले न्यानो मिठो भावना

जोडी वैभवले असंख्य जनता यै सभ्यता, साधना
जोगायौ धन-देश यो अमरता, क्वै छन् यता, क्वै उता
बाँध्यौ काव्य र प्रेमले, नियमले-राष्ट्रीय यो एकता |

– अनन्तगोपाल रिसाल (Jul 10,2010)

म स ज स त त गु ु
SSS IIS ISI IIS SSI SSI S
[छन्द-शार्दूलविक्रीडित , १९ अक्षरको एक पाऊ, चार पाऊको एक श्लोक, १२ र ७ मा यति, छन्द-अनुष्टुप ८,८ मा यति]

(गजल ) आचार्य प्रभा

भाषाको बिधाता बनेर आयौ भानु
घाँसीको उपदेश् सुनेर छायौ भानु ।

सबैको मनमा बसेर गुण गरि
नेपाली भाषाको उन्नती चाह्यौ भानु ।

अमर अजर रहेर तिमी अझै
हामीमा सुन्दर आभाष ल्यायौ भानु ।

देशको चिनारी दिएर म्रीत्यु रोज्दै
साहित्य मनको आदर पायौ भानु ।

मरण शैय्यामा पुगेर पनि तिमी
भाषामै होम्मिने कसम खायौ भानु ।

(भानु जयन्तिको उपलक्षमा रचित भानु गजल रचना -जुलाई १२ /२०१० )

Share

Leave A Response »